ഒൻ്റാരിയോയിലെ പ്രധാന ഹൈവേകളിലെ വേഗപരിധി ഈ ആഴ്ച മുതൽ വർദ്ധിപ്പിക്കുന്നു

ഒൻ്റാരിയോയിലെ പ്രധാന ഹൈവേകളായ '400-സീരീസ്' റോഡുകളിലെ വേഗപരിധി മണിക്കൂറിൽ 110 കിലോമീറ്റർ ആയി വർദ്ധിപ്പിക്കാൻ പ്രവിശ്യാ സർക്കാർ തീരുമാനിച്ചു. 2026 ജൂൺ 26 വെള്ളിയാഴ്ച മുതൽ ആരംഭിച്ച് സെപ്റ്റംബർ വരെയുള്ള വിവിധ ഘട്ടങ്ങളായാണ് ഈ മാറ്റം നടപ്പിലാക്കുന്നത്. യാത്രക്കാർക്ക് കൂടുതൽ വേഗത്തിലും സുരക്ഷിതമായും ലക്ഷ്യസ്ഥാനങ്ങളിൽ എത്തിച്ചേരാൻ സഹായിക്കുന്നതിനാണ് ഈ തീരുമാനമെന്ന് ഗതാഗത മന്ത്രി പ്രഭ്മീത് സർക്കാരിയ അറിയിച്ചു. ഒൻ്റാരിയോയിലെ ഏകദേശം 900 കിലോമീറ്ററിലധികം വരുന്ന ഹൈവേകൾക്ക് ഈ പുതിയ വേഗപരിധി ബാധകമായിരിക്കും.

കിഴക്കൻ ഒൻ്റാരിയോയിലെ ഹൈവേ 401, ഹൈവേ 416 എന്നിവയുടെ ചില ഭാഗങ്ങളിലാണ് ഈ വെള്ളിയാഴ്ച മുതൽ ആദ്യമായി വേഗത പരിധി കൂട്ടുന്നത്. തുടർന്നുള്ള ഘട്ടങ്ങൾ: ജൂലൈ 31, ആഗസ്റ്റ് 21, ആഗസ്റ്റ് 31, സെപ്റ്റംബർ 30 എന്നീ തീയതികളിൽ പ്രവിശ്യയിലെ മറ്റ് പ്രധാന ഹൈവേകളിലേക്കും (QEW, Hwy 400, 403, 404 തുടങ്ങിയവ) ഈ നിയമം വ്യാപിപ്പിക്കും. 2019-ൽ ആരംഭിച്ച പൈലറ്റ് പ്രോജക്റ്റുകളുടെയും, 2022, 2024 വർഷങ്ങളിൽ നടത്തിയ പഠനങ്ങളുടെയും അടിസ്ഥാനത്തിലാണ് വേഗത കൂട്ടുന്നത് സുരക്ഷിതമാണെന്ന് അധികൃതർ കണ്ടെത്തിയത്. കാനഡയിലെ മറ്റ് പ്രവിശ്യകളായ ആൽബർട്ട, സസ്‌കാച്ചവൻ, നോവ സ്കോഷ്യ എന്നിവിടങ്ങളിൽ ഇപ്പോൾത്തന്നെ മണിക്കൂറിൽ 110 കിലോമീറ്റർ വേഗത അനുവദനീയമാണ്. ഇതിന് സമാനമായാണ് ഇപ്പോൾ ഒൻ്റാരിയോയും വേഗപരിധി പുതുക്കുന്നത്.